اسلام آباد، 24 ستمبر(اے پی پی) وفاقی وزیر تجارت جام کمال خان نال پولینڈ دے سفیر ماسیج پسارسکی (Maciej Pisarski) دی وزارت تجارت وچ ملاقات تھئی۔ جاری پریس ریلیز موجب ملاقات وچ تجارت، سرمایہ کاری، توانائی، معدنیات تے زراعت سودھے مختلف شعبیں وچ تعاون تے ڳالھ مہاڑ تھئی۔اے ملاقات ایں ویلھے تھئی جݙاں پاکستان دی سفارتی سرگرمیاں وچ تیزی آندی پئی اے، جیندے وچ آسیان ممالک دے سفیراں نال اڄوکی ملاقاتاں تے سعودی عرب نال تجارتی روڈ میپ تے جاری کم شامل اے۔وفاقی وزیر پولینڈ دی معروف انرجی کمپنی اورلین (ORLEN) سابقہ پولش آئل اینڈ گیس کمپنی) دی پاکستان وچ موجودگی کوں ہک کامیابی قرار ݙتا۔ اے کمپنی پچھلے 26 سالاں کنوں پاکستان دے سندھ، بلوچستان بیلٹ وچ تیل و گیس دی ڳول تے پیداوار وچ تقریباً 50 کروڑ ڈالر دی سرمایہ کاری کر چکی اے تے اڳلے ݙاہ سالاں وچ ایں سرمایہ کاری کوں ودھاوݨ دا ارادہ رکھیندی اے۔پولینڈ دے سفیر ݙسایا جو اورلین دیاں نویاں دریافتاں، بشمول بران تے سرمزارانی ویسٹ دے بلاکس، موجودہ کرتان پہاڑیاں دیاں سرگرمیاں نال ملدن تے انتہائی حوصلہ افزا ہن۔ انہاں کجھ زیر التواء مسئلیں کوں وی اجاگر کیتا جنہاں کوں حل کرݨ دی لوڑھ اے ۔ وزیر تجارت یقین ݙیوایا جو سرمایہ کاراں دے اعتماد تے بلا تعطل کم کوں یقینی بݨاوݨ کیتے متعلقہ حکام دے نال انہاں معاملات کوں حل کیتا ویسی۔وزیر تجارت پولینڈ دیاں کمپنیاں کوں گلگت بلتستان تے بلوچستان وچ کولڈ سٹوریج، پھلاں دی حفاظت، ویکسنگ، گریڈنگ تے گوداماں دیاں سہولتاں قائم کرݨ کیتے پبلک تے پرائیویٹ شعبے دے نال شراکت داری دی دعوت ݙتی۔ انہاں ای ڈی ایف دے سولر پاورڈ مرچ خشک کرݨ دے منصوبے کوں ایجھی کامیاب مثال دے طور تے پیش کیتا جیڑھا تکھے مکمل کیتا ڳئے۔پولینڈ دے سفیر ایں تجویز دا خیرمقدم کریندے آکھیا جو پولینڈ دی گودام سازی تے لاجسٹکس وچ مہارت پاکستان کوں ٹرانسپورٹیشن لاگت گھٹ کرݨ تے برآمدات دا معیار بہتر بݨاوݨ وچ مدد ݙے سڳدی اے۔ وزیر تجارت آکھیے جو پولینڈ دی مہارت تے پاکستان دے گھٹ لاگت خام مال تے افرادی قوت دے امتزاج نال ݙوہیں ملکاں کیتے وݙی قدر پیدا تھی سڳدی اے۔جام کمال خان آکھیے اڳلے پنج سالاں وچ پاکستان تیل و گیس دے نال نال معدنیات تے کان کنی دے شعبے وچ وی پیش رفت کریسی کیوں جو بلوچستان وچ کاپر، لیگنائیٹ تے ٻئی معدنیات دے وسیع موقع موجود ہن۔ پولینڈ دے سفیر ݙسایا جو پولینڈ دنیا وچ لیگنائیٹ دا چوتھا تے کاپر دا اٹھواں وݙا پروڈیوسراے تے مشترکہ منصوبیں تے غور کرݨ کیتے تیار اے۔ملاقات وچ ثقافتی تعاون تے وی ڳالھ مہاڑ تھئی جیندے وچ اسلام آباد دی ہک سڑک دا ناں پولش ایئر کموڈور ولادیسلاو تروفچ (Władysław Turowicz) دے ناں تے رکھݨ دی تجویز پیش کیتی ڳئی۔ او 1948ء وچ پاکستان ایئرفورس دے قیام وچ مددگار رہیے تے بعد وچ کراچی وچ مقیم تھئے۔ ݙوہیں فریقین ایں مشترکہ ورثے کوں اجاگر کرݨ نال عوامی رابطے تکڑے تھیوݨ تے اتفاق کیتا۔ڈوہیں ملکاں اعلیٰ سطحی ملاقاتاں تے منصوبیں دے ذریعے ٹھوس اقدامات، معاہدے تے پراجیکٹس کوں حتمی شکل ݙیوݨ دا عزم کیتا۔ وزیر تجارت زور ݙتے جو نظریات کوں عملی جامہ پواوݨ ضروری اے تاں جو پاکستان دا ریگولیٹری تے ادارہ جاتی تعاون سرمایہ کاراں دی توقعات موجب ہووے۔ملاقات دے مکݨ تے وفاقی وزیر تجارت جام کمال خان پولینڈ نال طویل المدتی تے سانجھے فیدے تے مبنی شراکت داری دے ودھارے کیتے پاکستان دے عزم کوں دوہرائے۔ پولینڈ دے سفیر پاکستانی حکومت دی سرمایہ کار دوست پالیسیاں دی تعریف کیتی تے آکھیا جو وارسا اسلام آباد نال تعلقات کوں مزید گھاٹا کرݨ دا خواہشمند اے۔جام کمال خان آکھیے جو پاکستان وچ اورلین دے ݙو عشریں تے مشتمل سفر اے ثابت کیتا جو استقامت تے شراکت داری دا پھل ملدے۔ اساں چاہندوں جو ٻئی پولش کمپنیاں وی ایہو رستہ پکڑن۔
.jpg)
