اسلام آباد۔13اگست (اے پی پی):پاکستان دے75 ویں یوم آزادی دے موقع تے ڈائمنڈ جوبلی تقریبات دی مناسبت نال وزارت خزانہ دی طرفوں معاشی شرح نمو دے 75 روشن سال دے عنوان توں کتابچہ شائع کیتا ڳئے جیں اچ آکھیے جو 1950توں 2022 دے دوران ملک دی مجموعی قومی پیداوار( جی ڈی پی) 3 ارب ڈالر توں ودھ تے 383 تھی ڳئی اے ۔1950 اچ ملک دی جی ڈی پی دی شرح نمو 1.8 فیصد دے مقابلے اچ سال 2022 کیتے 5.97 فیصد تئیں ودھی اے ، ایں طرح 1950 توں 2022 دے عرصے اچ فی کس سالانہ آمدنی وی 86ڈالر دے مقابلے اچ 1,798 ڈالر سالانہ تئیں پڄ ڳئی اے ۔ رپورٹ موجب ایں عرصے دے دران ملک دی ممجموعی سالانہ برآمدات 163.9 ملین ڈالر توں 32.5ارب ڈالر تھی چکئن ۔ مزید ٹیکس محصولات دا سالانہ حجم 1950 دے 0.31 ارب روپے دے مقابلے اچ 2022تئیں 6,126.1 ارب روپے دی نمایاں سطح تئیں ودھئن ۔مالی سال50۔ 1949 اچ پاکستان دی مجموعی جی ڈی پی اچ زراعت دے شعبہ دا حصہ59.9 ہئی، تاں جو 1960 دے ݙھاکے دے شروع اچ ملک اچ سبز انقلاب دا آغاز تھیا جیں توں بعد زرعی شعبہ دی کارکردگی اچ چنڳاں ودھارا تھیا ۔ معاشی شرح نمو دے 75 روشن سال دے مطابق آزادی ویلھے پاکستان کوں 921 صنعتی یونٹس اچوں صرف 34 صنعتی یونٹ ورثے اچ ملیے ہن ، لیکن پاکستان صنعت دے شعبہ اچ وی چنڳی کاکردگی ݙکھائی اے تے ایں ویلھے پاکستان دا شمار ٹیکسٹائلز دے وݙے ملکاں اچ تھیندے ایں توں انڄ ٻئے اجناس تے مصنوعات وی دنیا دے ملکاں کوں برآمد کیتیاں ویندیاں پئن۔ 1999 اچ لاہور توں اسلام آباد چھی رویہ موٹروے دی تعمیر مکمل تھئی ۔ ایں ویلھے نیشنل ہائی ویز اتھارٹی ( این ایچ اے)دا نیٹ ورک 48 قومی شاہراواں تے مشتمل اے۔ مزید موٹر ویز پاکستان دے “قومی تجارتی راہداری منصوبے” اتے “چین پاکستان بیلٹ روڈ انیشیٹو” دا حصہ ہن۔ مئی 1998 اچ پاکستان پنج جوہری تجربے کرݨ دے بعد کامیابی توں قابل اعتبار گھٹ توں گھٹ جوہری ڈیٹرنس قائم کرتے خطے اچ طاقت دا توازن بحال کیتا۔ رپورٹ موجب پاکستان اچ اسلامی بینکاری دا پہلا لائسنس جنوری 2002 اچ جاری کیتا ڳیا ہئی تے ملک دے پہلے اسلامی بینک مارچ 2002 اچ مکمل کمرشل بینکنگ آپریشن دا آغاز کیتا۔
.jpg)
