اسلام آباد۔14دسمبر(اے پی پی) چیئرمین سینیٹ محمد صادق سنجرانی آکھیے لیبیا تے پاکستان دے تعلقات کہیں توں لکیے ہوئے کائںی ،پاکستان اچ افرادی قوت دی کمی کائنی تے لیبیا کوں ایں توں فیدہ چاوݨاں چاہیدے ۔ ݙوہیں ملکاں وچال اقتصادی، تجارتی، تعلیمی اتے دفاعی سطح تے تعاون کوں مزید تقویت ݙتی ونڄ سڳدی اے ۔ سینیٹ سیکرٹریٹ تون جاری بیان موجب اے ڳالھ انہاں لیبیا دی پارلیمنٹ دے ڈپٹی اسپیکر فاوزی الطاہر النویری دی سربراہی اچ وفد نال ڳالھ مہاڑ کریندے ہوئیں آکھی اے جنہاں ٻدھ کوں پارلیمنٹ ہاوس اچ ملاقات کیتی۔ چئیرمین سینیٹ پارلیمنٹ ہاؤس اچ اعلی حکام دے رلے وفد دا استقبال کیتا۔ملاقات اچ سانجھی دلچسپی دے امور، ݙو پاسے تعاون، پارلیمانی و تجارتی سطح تے وفد دے تبادلیں کوں تکھا کرݨ تے ڳالھ مہاڑ کیتی ڳئی ۔ ایں موقع تے چیئرمین سینیٹ آکھیے لیبیا اتے پاکستان دے تعلقات کہیں توں لکیے ہوئے کائنی ۔ لیبیا دے لوک وݙے دل آلے ہن۔ پاکستانی قوم لیبیا دے صدر دے دورہِ پاکستان دی منتظر اے۔ انہاں آکھیے پاکستان تے لیبیا وچال سرکاری اتے ڈپلومیٹک پاسپورٹ تے بغیر ویزا سفر دیاں سہولتں دے معاہدے تے عمل درآمد ہووݨا چاہیدے ۔ لیبیا پاکستان وچال ادارہ جاتی معاونت رابطے کوں مزید مستحکم کرݨ اچ مدد گار ثابت تھیسی۔ چیئرمین سینیٹ آکھیے ݙوہیں ملکاں وچال اقتصادی، تجارتی، تعلیمی اتے دفاعی سطح تے تعاون کوں ٻیا ودھایا ونڄ سڳدے ۔چیئرمین سینیٹ آکھیے اعلی سطح وفد دے دورے نال ݙوہیں ملکاں دے درمیان تعاون دے دائرہ کار کوں ودھارا تھیسی ، امید اے جو اے دورہ عوامی سطح تے رابطے ودھاوݨ اچ اہم پیش خیمہ ثابت تھیسی ۔ ملاقات اچ ڈپٹی اسپیکر فاوزی الطاہر النویری آکھیے جو پاکستان آتے ٻہوں خوشی تھئی اے ۔ لیبیا دی عوام پاکستان نال محبت کریندن ۔ ڈپٹی اسپیکر فاوزی الطاہر النویری چیئرمین سینیٹ کوں لیبیا دے دورے دی دعوت ݙتی۔ ڈپٹی اسپیکر فاوزی الطاہر النویری آکھیے لیبیا تے پاکستان ݙوہیں قدرتی وسائل توں مالا مال ہن۔ قدرتی وسائل دا بہتر استعمال کریندے ہوئیں ھک ݙوجھے دی لوڑھ کوں پورا کیتا ونڄ سڳدے ۔ پاکستان اچ موجود سرمایہ کاری دے مواقع توں فیدہ چیسوں ۔ انہاں آکھیے پاکستان دا دورہ کرتے دلوں ٻہوں خوشی تھئی اے ، لیبیا، پاکستان نال آپݨے پراݨے بھرپی آلے تعلقات کوں وݙی اہمیت ݙیندے ۔ ݙوہیں ملکاں وچال پارلیمانی سطح تے تعلقات کوں مزید ودھاوݨ چاہندوں۔
.jpg)
