اسلام آباد۔25اگست (اے پی پی):وفاقی دارالحکومت اسلام آباد اچ ترائے ݙینھ وار”پاکستان ایران تجارتی نمائش“خمیس کوں ݙوجھے ݙینھ وی جاری رہی ۔ نمائش دا مقصد ݙوہیں ملکاں وچال سانجھی تجارت اتے سرمایہ کاری کیتے تعاون ودھاوݨ اے ۔ ”پاکستان ایران تجارتی نمائش“توں خطاب کریندے ہوئیں مقررین آکھیے جو نمائش ݙوہیں ملکاں دی تاجر برادری اتے عوام کوں ھک ݙوجھے دے نیڑے گھن آوݨ تے سانجھی تجارت کوں ودھاوݨ ݙیوݨ اچ معاون ثابت تھیسی ، انہاں آکھیے جو جغرافیائی حیثیت نال پاکستان تے ایران ھک اہم محل وقوع رکھیندن جیں توں علاقائی تجارت دی ترقی اتے خطے دے ملکاں دے جیو اکنامک اہداف دے حصول اچ مدد مل ویسی ۔ ایران تے پاکستان دوست اتے ہمسایہ ملکاں دے طور تے تاجراں تے اقتصادی کارکناں دی ھک ݙوجھے دی مارکیٹ تئیں رسائی کوں سوکھا بݨا تے اقتصادی تعلقات کوں ودھارا ݙتے ۔ ایں نمائش توں تاجراں اتے معاشی میدان اچ سرگرم لوکاں کوں بہترین موقع ملے ۔ آئی ٹی اتے فوڈ انڈسٹریز وی نمائش دا حصہ اے۔ پاک چین فرینڈشپ سنٹر اسلام آباد اچ جاری اے نمائش ݙوہیں ملکاں دیاں منڈیاں دی لوڑھ کوں سامݨے رکھیندے ہوئیں لاتی ڳئی اے جیں اچ اعلیٰ معیار دی مصنوعات کوں متعارف کرایا ویندا پئے۔
.jpg)
