اسلام آباد۔15فروری(اے پی پی)وفاقی کابینہ اقتصادی رابطہ کمیٹی اتے کابینہ کمیٹی برائے نجکاری و توانائی دے فیصلاں دی توثیق کریندے پی ٹی وی ولوں غیر ملکی براڈ کاسٹرز کوں کھیݙاں دے مقابلاں دے نشریاتی حقوق دی مد اچ ادائیگیاں دی اجازت ݙے ݙتی۔ وفاقی کابینہ دا اجلاس نگران وزیراعظم انوار الحق کاکڑ دی اڳواݨی اچ تھئے۔ کابینہ وزارت تجارت دی سفارش تے اقوام متحدہ ترقیاتی پروگرام (یو این ڈی پی) دے تحت افغانستان کنٹری آفس دے استعمال اچ گاݙیاں دے سپئیر پارٹس اتے نویں ٹائراں دی کراچی پورٹ توں کابل، افغانستان ٹرانزٹ/ منتقلی دی منظوری ݙے ݙتی۔ وفاقی کابینہ وزارت دفاعی پیداوار دی سفارش تے سیکرٹریٹ گروپ دے گریڈ 20 دے افسر خان نواز دی ہیوی انڈسٹری ٹیکسلا اچ بطور ممبر فنانس ولا تعیناتی دی منظوری ݙیندے وزارت خزانہ دی سفارش تے جے ایس بینک دے سپانسرنگ شیئر ہولڈر شبیر احمد رندیری کوں بینکنگ کمپنیز آرڈیننس دے سیکشن (IV)(1)14 توں استثنیٰ ݙیوݨ دی وی منظوری ݙے ݙتی۔ کابینہ وزارت داخلہ دی سفارش تے ݙوڑی شہریت دے ملزم عرفان قادر بھٹی کوں ناروے دے حوالے کرݨ دی منظوری ݙتی جیڑھا ناروے اچ دہشتگدی دا ملزم اے۔ وفاقی کابینہ وزارت تخفیف غربت و سماجی تحفظ دی سفارش تے منیجنگ ڈائریکٹر پاکستان بیت المال دی خالی آسامی تے سید طارق محمد الحسن دی تعیناتی دی منظوری ݙتی۔ کابینہ اچ کابینہ کمیٹی برائے توانائی دے 6 فروری 2024 ،کابینہ کمیٹی برائے لیجسلیٹو کیسز دے 7 فروری 2024 ،کابینہ کمیٹی برائے نجکاری دے 7 فروری 2024 اتے اقتصادی رابطہ کمیٹی دے 7 فروری 2024 اتے 14 فروری 2024 دے اجلاس دے فیصلاں دی توثیق وی کیتی ڳئی۔
